رادیۆی دەنگ

چاندنی نەمامی جۆری “واشنتۆنیا” لەلایەن شارەوانییەکانی سنورەکەوە بوەتە جێگای رەخنەی هاوڵاتیان، بەتایبەتی کە دەڵێن نە سێبەری هەیە و نە بەر، بەرپرسێکی شارەوانیش جەختدەکاتەوە بۆ ژینگەی ناوچەکە گونجاوە.

نەمامی واشنتۆنیا، یەکێکە لە جۆرە باوەکانی دار و نەمام کە لە خێزانی دارخورما و پالمەکانە. ئەم نەمامە بە زۆری بۆ جوانکاریی و رازاندنەوەی شەقامەکان و باخچە گشتییەکان و بلوارەکان بەکاردێت. لەگەرمیانیش رێژەیەکی زۆر لەم نەمامە چێنراوە، لەکاتێکدا هەندێک لە هاوڵاتیان تێبینییان هەیە لەبارەی ئەوەی کە نەمامەکە بۆ سێبەر و بەرهەم “بەر” سودی لێنابینرێت.

لەبەرامبەردا، نیهاد وەلی، بەڕێوبەری بەشی باخچەكان لە بەڕێوبەرایەتی گشتی شارەوانییەكانی گەرمیان، بە رادیۆی دەنگی وت: ئەو جۆرە نەمامە بۆ جوانی بەكاری دەهێنین، هەندێك شوێن هەیە كە پێویستی بە سێبەر نییە، تەنها بۆ جوانی لەو جێگایانە دایدەنێین.

جەختیشیکردەوە کە نەمامەکە لەگەڵ ژینگەی سنورەکەدا دەگونجێت و چاندنی سەرکەوتو بوە.

لە بارەی چاندنی نەمامی بەرهەمداریشەوە، وتی: تەنها داری زەیتون و تو ئەچێنین لە دورگەكانی ناوەڕاستی شەقامەكان و پارك و باخچەكان، چونكە بەرگەی گەرما دەگرن و سێبەریشیان هەیە.