دوای ئەوەی ٤ کەس لەقەزای رزگاریی لە نۆرەی بەنزین بەشەڕهاتن، پۆلیسی گەرمیان رونکردنەوە لەسەر بابەتەکە دەدات و وردەکاریی دەخاتەرو.

بەیانی ئەمڕۆ لە نۆرەی وەرگرتنی بەنزین لە بەنزینخانەی 'ئاسۆ'ـی قەزای رزگاریی گرژی و ئاڵۆزی رویداو ٤ کەس بەشەڕهاتن، بەپێی وتەی شایەتحاڵێکی شوێنی روداوەکە، ئەو ٤ کەسە بەبلۆک و بەرد داویانە لایەک.

سۆران محەمەد غەریب، وتەبێژی پۆلیسی گەرمیان بۆ رادیۆی دەنگ جەختی لە روداوەکە کردەوە و وتی: لەسەر نۆرەی بەنزین کێشە لەنێوان ئەم کەسانە دروست بوە، ئازاری یەکتریان داوە، پەلاماریی یەکتریان داوە و برینداربون و برینەکانیان سوکە.

وتیشی: لە ئێستادا هەردولا 'واتا لایەکیان ۳ کەسە، لایەکی دیکەیان ۱ کەسە' سەرقاڵی راپۆرتی پزیشکین و سەرقاڵی سکاڵاکردنن لە یەکتر لە بنکەی پۆلیسی قەزای رزگاریی.

بەپێی وتەی وتەبێژی پۆلیسی گەرمیان: ئەگەر سکاڵا کرا، بەپێی سکاڵاکان دادوەر فەرمانی راگرتنیان دەردەکات یاخود بە کەفالەت ئازادیان دەکات.