رادیۆی دەنگ

تاوەکو ئێستا ۱ تانکەری بانزینی ٧٥٠ دیناریی بەسەر قەزای کفری دابەشکراوە، چالاکوانانی قەزاکە دەڵێن جیاکاریی دەکرێت و بەڕێوبەرایەتی نەوت و کانزاکانی گەرمیانیش بێ وەڵامە.

بانزینی نۆرماڵی ۷٥۰ دیناری ئەو جۆرە بانزینەیە کە حکومەت پاڵپشتی دەکات، کەتێیدا پارێزگاکان و ئیدارە سەربەخۆکان پشکی خۆیان هەیە، ئەمەش لەکاتێدایە کە بەشێک لە چالاکوانانی کفری و هاوڵاتیان گازندەی ئەوە دەکەن کە جیاوازیی دەکرێت لەنێوان قەزای کەلار و کفریدا.

لەوبارەوە، رەئوف عومەر، چالاکوان لە کفری، لە هەژماری خۆی لە فەیسبوک رایگەیاندوە: ٨ تەنکەر بەنزینی ٧٥٠ دیناری بە کەلار دراوە، لەبەرامبەردا یەک تەنکەر لە کفری دابەشکراوە.

دەشڵێت: "بیانوەکەش ئەوەیە کەوا خەڵکی کفری نزیکن لە عێڕاقەوە و لەوێ بەنزین دەکەن بە ٤٥۰ دینار (..) یەعنی ئەتانەوێ کفری هەر بە ڕەسمی بخەنە سەر دیالە؟"

بەپێی بەدواداچونێکی رادیۆی دەنگ، تاوەکو ئێستا ۱ تانکەری بانزینی ۷٥۰ دیناریی لە قەزای کفری دابەشکراوە و بڕیارە سبەی تانکەرێکی دیکە دابەشبکرێت، بەڵام لەقەزای کەلار ٨ تانکەر دابەشکراوە.

لەبەرامبەر ئەم نیگەرانییەدا، تائێستا بەڕێوبەرایەتی نەوت و کانزاکانی گەرمیان رونکردنەوەی نەبوە.

لەوبارەیەوە رادیۆی دەنگ چەند جارێک پەیوەندی بە یادگار فەتاح، بەڕێوبەری بەڕێوبەرایەتی نەوت و کانزاکانی گەرمیانەوە کرد، بەڵام پەیوەندییەکانی بێ وەڵام بون.