كاسبكارانی عەلوەی كەلار گیرۆدەی تێپەڕنەبونی بارەكانیانن لە بازگەی باوە مەحمود لە خانەقین، كاسبكارێك دەڵێت: ٦٠٪ـی جموجوڵی بازرگانی عەلوەكەی لاوازكردوە.

لە سێ مانگی رابردودا كاسبكارانی عەلوەی كەلار بە دەربڕینی ناڕەزایەتی و گردبونەوە، باسیان لە گرفتەكەیان كرد كە بریتییە لەوەی بازگەی باوە مەحمود لە خانەقین رێگریی دەکات ئەو بارانەی كە هاوردەن، پیایدا تێپەڕبێت بۆ ناوچەکانی ناوەڕاست و خواروی عێراق.

كاروان ئەبوبەكر، كاسبكار لە عەلوەی كەلار، بۆ رادیۆی دەنگ وتی: هێشتا بازگەكە نەكراوەتەوە بەڕوی ئەو بارانەی كە لە پەروێزخان و باشماخەوە ئەیهێنین.

وتیشی بازگەكە تەنها رێگە بە تێپەڕبونی بارە عێراقییەكان دەدات، ئەمەش جموجوڵی بازرگانی عەلوەكەی ٦٠٪ لاوازكردوە.

کێشەی تێپەڕبونی بارەکان پەیوەندیی هەیە بەو ناکۆکییانەی کە لەنێوان حکومەتی عێراق و هەرێمدا هەیە سەبارەت بە یەکخستنی سیستەمی بازرگانی و گومرک و ئەسیکۆدا، کە وایکردوە عێراق رێگریی بکات لەوەگ باری هاوردەکراوی دەرەوەی وڵات، لە هەرێمەوە بۆ عێراق بچێت.