رادیۆی دەنگ

دوای رۆژێک لە روداوی تەقەکردن لە ماڵی بەرپرسی بەشی خانەقینی پۆلیسی دارستان و ژینگەی گەرمیان، تائێستا تۆمەتباری روداوەکە نەناسراوەتەوە و دەستگیر نەکراوە، بەڕێوبەرایەتی پۆلیسی گەرمیانیش دواین زانیاریی دەخاتەڕو.

بەرەبەیانی دوێنێ، دوای تەواوکردنی ئەرکی فەرمی، بەرپرسی بەشی خانەقینی پۆلیسی دارستان و ژینگەی گەرمیان درەنگانێک گەڕاوەتەوە بۆ ماڵی خۆیان، بە چەند خولەکێک دواتر و لەکاتژمێر (٢:٣)ـی بەرەبەیان، ماڵەکەی درایە بەر دەستڕێژ و نزیکەی  ۳۰ فیشەکی پێوەنراوە. روداوەکەش جگە لەزیانی ماددی، زیانی گیانی لێ نەکەوتەوە.

لەبارەی دۆزینەوەی تۆمەتباری تاوانەکەوە، عەقید سۆران محەمەد غەریب، وتەبێژی بەڕێوبەرایەتی پۆلیسی گەرمیان، بۆ رادیۆی دەنگ وتی: لێکۆڵینەوە بەردەوامە.

وتیشی: هێزەکانمان شەو و رۆژیان خستوەتە سەریەک بۆ دۆزینەوەی تۆمەتباری تاوانەکە.

هەر ئەوکات نەقیب هاوڕێ جەلیل، بەرپرسی بەشی خانەقینی پۆلیسی دارستان و ژینگەی گەرمیان، بۆ رادیۆی دەنگ وتی: هیچ کێشەکی کۆمەڵایەتیم نییە لەگەڵ کەسدا، ئەوەی هەیە گومان دەکەم پەیوەندی بە ئەرکی فەرمییمەوە هەبێت.

ئەو ئۆتۆمبێلەی کە فیشەکەکانی پێوە نراوە، ئۆتۆمبیلێکی حکومییە لەجۆری میسیۆبیشی پیکئاب و ۲۲ فیشەکی بەرکەوتوە.