بڕیارە بەمنزیكانە گەڕی دوەمی پڕۆژەی گەشانەوە کە تایبەتە بە پێدانی قەرز بۆ گەنجان، بچێتە بواری جێبەجێكردنەوە لە گەرمیان، بڕیاردەری پڕۆژەكەش دەڵێت: تەنها بڵاوكردنەوەی لینكەكەی ماوە.

پرۆژەی گەشانەوە کە لەلایەن وەزارەتی کار و کاروباری کۆمەڵایەتییەوە سەرپەرشتی دەکرێت، بریتییە لە پێدانی قەرزی بچوک بە گەنجان. بڕەکەیشی لەنێوان ٣٠ ملیۆن تا ١٥٠ ملیۆن دینارە، کە بڕیارە بەو کەسانە بدرێت کە تەمەنیان ٢٥ بۆ ٦٠ ساڵە و خاوەنی پرۆژەیەکی بازرگانی و پیشەسازیی بن کە تەمەنی لە ساڵێك زیاتربێت و بیانەوێت پەرەی زیاتری پێبدەن.

ئارام كەریم، بڕیاردەری پڕۆژەی گەشانەوە لە گەرمیان، بە رادیۆی دەنگی وت: هەمو كارەكانی پڕۆژەی گەشانەوە تەواوبوە، تەنها کاراکردنی لینكەكەی ماوە.

جەختیشیکردەوە: بەمنزیكانە لینکەکەش کارا دەكرێت و بڵاودەكرێتەوە، بۆ ئەوەی گەنجان داواکارییەکانیان پێشکەش بکەن.

بڕوای خۆیشی پیشاندا کە پێش ساڵی نوێ کاراکردنەکە ئەنجام بدرێت.