رادیۆی دەنگ

هاوڵاتیەک دەڵێت، دو مناڵی خاوەنپێداویستی تایبەتیان لە قوتابخانەیەکی کەلار "بە ناهەق" دەرنەچێنراون، وەکخۆی دەڵێت: پەروەردەی کەلار لیژنەی دروستکردوە، بەڵام سودی نەبوە.

هاوڵاتی پەرژین خالد، پوری ئەو مناڵانە بە رادیۆی دەنگی راگەیاند: هەر دو مناڵەکەمان خاوەنپێداویستی تایبەتن و بڕیار وابو لە قوتابخانەکە پۆلی تایبەت و مامەڵەی تایبەتیان لەگەڵ بکرێت بۆ خوێندن و تاقیکردنەوەکان، بەڵام نەیانکردوە.

دەشڵێت: ئێستا هەردوکیان لە پۆلی چواری بنەڕەتین و "بەمەبەست" دەرنەچێنراون.

جەختی لەوەشکردوە: سەردانی پەروەردەمان کردوە و لیژنەشیان بۆ پێکهێناوە، بەڵام لیژنەکە نەیتوانیوە کاری خۆی بکات و سودی نەبوە و پشتگیری قوتابخانەکە دەکەن.

لەبەرامبەردا، رادیۆی دەنگ، چەند جارێک پەیوەندی بە عەدالەت لەتیف، بەڕێوبەری پەروەردەی کەلارەوە کرد، ناوبراو پەیوەندیەکەی بێوەڵام بو.