رادیۆی دەنگ

بەهۆی ئەوەی لە بەرنامەیەکی تەلەفزیۆنییدا ستایشی سەدام حسێنی کردوە، ٧٠ کەس لە کەسوکاری ئەنفالکراوانی گەرمیان، دژی عومەر فەقێ سکاڵایان تۆمارکردوە و ئەویش بڕیار بو ئەمڕۆ ئامادەبێت لەبەردەم دادوەری کەلار، بەڵام نەهات و هاتنەکەی دواخرا بۆ هەفتەی داهاتو.

عومەر فەقێ کە لە تۆڕە کۆمەڵایەتییەکان وەکو وتاربێژ دەرکەوتوە و کاندیدی پێشوی پەرلەمانی کوردستانە، لە چاوپێكەوتنێكی تەلەفزیۆنییدا پەسنی  سەرۆكی پێشوتری عێراق- سەدام حسێنی دا و لە بڕگەیەکدا دەڵێت: "گۆڕی پڕ نور بێت". بەمهۆیەوە لەلایەن كەسوكاری ئەنفالكراوانی گەرمیانەوە سكاڵای لەسەرتۆماركرا.

سەرۆكی كۆمەڵەی داكۆكی لە مافی كەسوكاری ئەنفالكراوان، ئەكرەم ساڵح، بە رادیۆی دەنگی وت: دوای تۆمارکردنی سکاڵاکان، بڕیار بو ناوبراو ئەمڕۆ بێتە بەردەم دادگای کەلار، بەڵام نەهات.

 وتیشی: نەهاتنەکەی جێگەی گومان نییەو بەهۆی کێشەی خێزانییەویە، بۆیە دانیشتنەکە دواخرا بۆ هەفتەی داهاتو.

جەختی لەوەشكردەوە: وەكو كەسوكاری ئەنفالكراوان هەرگیز لەو كەسانە خۆشنابین وەسف و ستایشی كەسێك بكەن كە كوردی كۆمەڵكوژ و زیندەبەچاڵ و ئەنفال كردوە، بەڵکو دەبێت لەسەر ئەو کارەی کردویەتی بە سزای خۆی بگات.