رادیۆی دەنگ

كێشه‌ى سوتاندنى تایه‌ و پاشماوه‌ له‌ ناوچه‌ى پیشه‌سازیی كه‌لار تاوه‌كو ئێستا به‌رده‌وامى هه‌یه‌، قایمقامیه‌تى قه‌زاى كه‌لاریش ده‌ڵێت: لیژنه‌ ئه‌منیه‌كانمان ئاگاداركردوه‌ته‌وه‌ هه‌ركه‌سێك له‌و ناوچه‌یه‌ بینرا ده‌ستگیرى بكه‌ن.

ئه‌فراسیاو مه‌حمود، سه‌رۆكى لیژنه‌ هه‌میشه‌ییه‌كانى قایمقامیه‌تى قه‌زاى كه‌لار، بۆ رادیۆى ده‌نگ باسى له‌وه‌كرد: هه‌ندێكجار ئه‌و پاشماوه‌ و تایانه‌ى كه‌ ده‌سوتێنرێن له‌لایه‌ن هاوڵاتیانە‌وه‌، زیاتر لەکاتی ئێوارانه‌ و ئەو جێگایانە چۆڵ دەبن.

وتیشى: ئەو کەسانە دوای کردنەوەی ئاگرەکە، خۆیان دەشارنەوە و دواتر ده‌گه‌ڕێنه‌وه‌ بۆ هه‌ڵگرتنه‌وه‌ى سیمه‌كانى ناویان.

جه‌ختى له‌وه‌شكرده‌وه‌: لیژنه‌ى ئه‌منى خۆمان له‌گه‌ڵ لیژنه‌ى پۆلیسى دارستان و ژینگەمان ئاگاداركردوه‌ته‌وه‌ به‌به‌رده‌وامى چاودێرىی ئه‌و ناوچه‌یه‌ بكه‌ن، هه‌ركه‌سێكیان بینى هەوڵی کاری لەوشێوەیە دەدات له‌و سنورەدا،‌ ده‌ستگیرى بكه‌ن.