رادیۆی دەنگ

بەڕێوبەرایەتی چاودێریی بازرگانی گەرمیان ئاشکرای دەکات بەبێ پرسی ئەوان نرخی لەفە لەبازاڕی ناوچەکەدا گرانکراوە، دەشڵێت: بەدواداچون دەکەین بۆ ئەو بابەتە دەکەین.

لەماوەی رابردودا نرخی لەفە جۆراوجۆرەکان لە خواردنگەکانی گەرمیان گرانکران، لەفەکانی فەلافل و باینجان و پەتاتە و کوبە، کران بە ٧٥٠ دینار لەکاتێکدا پێشتر ٥٠٠ دینار بون. هاوکات پێشتریش لەفەی گۆشت و مریشکیش گرانکرابو.

حیکمەت ئەحمەد، بەڕێوبەری بەڕێوبەرایەتی چاودێریی بازرگانی گەرمیان، بۆ رادیۆی دەنگ وتی: خواردنگەکان بەبێ ئاگاداری ئێمە ئەو کارەیان کردوە، بەدواداچونیشمان کردوە بۆ ئەو مەبەستە.

وتیشی: پێشتر هۆکاری گرانکردنەکە پەیوەستکرا بە کەمبونەوەی غازەوە، ئێستا دیسان بۆ ئەو بابەتە لەگەڵ قایمقامیەتەکاندا کۆدەبینەوە و بڕیاری لەسەر دەدەین کە نرخەکان چیان لێبکرێت.