بەڕێوبەری نه‌خشه‌دانانى گه‌رمیان ئاشکرای دەکات کە هه‌ژمارێكى بانكىی كراوه‌ته‌وه‌ بۆ پارەدارکردنی پرۆژەی دروستكردنى ماسته‌رپلانى قه‌زاى كه‌لار، بەشێوەیەک %2ـى داهاتى شاره‌وانى قه‌زاكه‌ بۆ ئەو پرۆژەیە ‌‌ ده‌بێت.

سامان مه‌حمود، به‌ڕێوبه‌رى بەڕێوبەرایەتی نه‌خشه‌دانانى ئاوه‌دانى گه‌رمیان، بۆ رادیۆى ده‌نگ وتی: بودجه‌ى دروستكردنى ماسته‌رپلانى قه‌زاى كه‌لار له‌سه‌ر خودى شاره‌وانى قه‌زاكه‌یه‌، چونكه‌ سه‌رۆكایەتی شاره‌وانى کەلار له‌ ماوه‌كانى رابردو به‌ نوسراوى فه‌رمى داواى له‌ وه‌زاره‌تى شاره‌وانى كرد كه‌ له‌سه‌ر داهاتى شاره‌وانى و فرۆشتنى زه‌وى نایاب تێچوى ماستەر‌پلانى قه‌زاكه‌ ده‌گرێته‌ ئه‌ستۆ.

ده‌شڵێت: له‌ ئێستادا هه‌ژمارێك بانكىی كراوه‌ته‌وه‌ بۆ ئه‌و مه‌به‌سته‌ و‌ %2ـى داهاتى شاره‌وانى کەلار ده‌چێتە ئه‌و هه‌ژماره‌وه‌ بۆ دابینکردنی تێچوى ماسته‌رپلانه‌كه‌.

وتیشى: دروستكردنى ماسته‌رپلانى قه‌زاى كه‌لار له‌سه‌ر داهاتى خودى شاره‌وانیه‌ نه‌ك حكومه‌ت.

ئەمەش لەکاتێکدایە تائێستا پرۆژەکە نەچوەتە بواری جێبەجێکردنەوە، چونکە جاری یەکەم کە بانگەوازی بۆ کرا، تەندەرەکە بۆ هیچ کۆمپانیایەک دەرنەچو و لەئێستادا بانگەوازی تەندرەکە بۆ جاری دوەم کراوەتەوە.