رادیۆی دەنگ

بۆماوه‌ى زیاتر له‌ 2 ساڵه‌ شاره‌وانى ناحیه‌ى باوه‌نور بێ سه‌رۆكه‌، لایه‌نه‌ په‌وه‌ندیداره‌كانیش لێدوانى جیاوازیان له‌وباره‌یه‌وه‌ هه‌یه‌، پۆسته‌كه‌ش به‌به‌تاڵى ماوه‌ته‌وه‌.

به‌پێى زانیارییه‌كانى رایۆى ده‌نگ، بۆ ماوەی زیاتر له‌ 2 ساڵه‌ پۆستى سه‌رۆكایه‌تى شاره‌وانى ناحیه‌ى باوه‌نور به‌ به‌تاڵى ماوه‌ته‌وه‌ و له‌لایه‌ن سه‌رۆكى شاره‌وانى ناحیه‌ى شێخ ته‌ویله‌وه‌ به‌وه‌كالەت به‌ڕێوه‌ده‌برێت.

له‌ باره‌ى هۆكارى پڕنه‌كردنه‌وه‌ى ئه‌و پۆسته‌ له‌ ماوه‌كانى رابردودا، به‌رزان كه‌ریم، به‌ڕێوبه‌رى گشتى شاره‌وانیه‌كانى گه‌رمیان بۆ رادیۆى ده‌نگ جه‌ختى له‌وه‌كرده‌وه‌: بۆ پڕكردنه‌وه‌ى ئه‌و پۆسته‌ چاوه‌ڕوانى ئیداره‌ى گه‌رمیانین، كه‌سێك پێشنیار بكه‌ن بۆ ئه‌و مه‌به‌سته‌.

لەبەرامبەردا، چۆمان ئەحمەد، بەرپرسی راگەیاندن و پەیوەندییەکانی ئیدارەی گەرمیان بۆ رادیۆی دەنگ باسی لەوەکرد: بەڕێوبەرایەتی گشتی شارەوانیەکانی گەرمیان نوسراویان ئاراستەکردوین بۆ ئەوەی کەسێک دابنرێت.

دەشڵێت: بەهۆکاری ئەوەی کە کەس دانەنراوە ئەوەیە، نوسراوێکی ئەنجومەنی وەزیران هەیە کە گواستنەوەی بە هەمو شێوەیەک راگرتوە، بۆیە ناتوانین کەسێک لە وەزارەتەکانی ترەوە بنێرین بۆ ئەوەی ببێت بە سەرۆکی شارەوانی ناحیەکە.