رادیۆی دەنگ

دواى ئه‌وه‌ى نرخى به‌نزین له‌ به‌نزیخانه‌كانى گه‌رمیان به‌رزبویەوه‌، چاودێریی بازرگانى گه‌رمیان ده‌ڵێت: له‌ سه‌رچاوه‌ى سه‌ره‌كى هێنانى به‌نزینه‌وه‌، نرخەکە گران بوه‌.

نرخی بەنزین لە گەرمیان بەرزبوەتەوە بە جۆرێک بۆ هەر لیترێک بەنزین ٥٠ بۆ ١٠٠ دیناری رۆشتوەتە سەر.

یادگار فەتاح، بەڕێوبەری بەڕێوبەرایەتی نەوت و کانزاکانی گەرمیان، لەوبارەوە بۆ رادیۆی دەنگ وتی: ئەو بەنزینەی لە گەرمیان هەیە، هەموی بازرگانییە و حکومەت هیچ بەنزینێکی پاڵپشتیکراوی نیە.

دەشڵێت: ئەرکی ئێمەش تەنها چاودێریکردنە لەڕوی کوالێتی و ئەنجامدانی پشکنینەوە، بۆ مەسەلەی دیارییکردنی نرخ، بەڕێوبەرایەتی چاودێریی بازرگانی دەتوانن بەدواداچون بکەن.

لایخۆشییەوە، حیكمه‌ت ئه‌حمه‌د، به‌ڕێوبه‌رى بەڕێوبەرایەتی چاودێریی بازرگانى گه‌رمیان، بۆ رادیۆى ده‌نگ باسى له‌وه‌كرد: به‌پێى به‌دواداچونه‌كانمان كه‌ له‌ نێو به‌نزینخانه‌كان كردومانه‌، هۆكارى به‌رزبونه‌وه‌ى نرخى به‌نزین په‌یوه‌ندى به‌ خودی بانزینخانەکانەوە نییە، بەڵکو هۆكاره‌كه‌ى له‌ سه‌ره‌وه‌یه‌.

رونیکردەوە: ‌ له‌ پارێزگاى سلێمانیه‌وه‌ به‌نزین ده‌هێنرێته‌ ناوچه‌كه‌ و له‌وێوه‌ نرخه‌كه‌ى به‌رزبوته‌وه‌، ئه‌مه‌ش وایكردوه‌ نرخى به‌نزین لێرەش گران ببێت.