بەڕێوبەرایەتی گشتی تەندروستی گەرمیان جەخت لە توندکردنەوەی چاودێرییەکان دەکاتەوە بۆ سەر ناوەندە پزیشکییەکان و رایدەگەیەنێت کە بەهۆی پابەندنەبون بە رێنماییەکان، چەندین شوێن روبەڕوی سزای یاسایی و داخستن بونەتەوە.

ئازاد محەمەدفەرەج، وتەبێژی بەڕێوبەرایەتی گشتی تەندروستی گەرمیان، لە لێدوانێکدا بۆ رادیۆی دەنگ رایگەیاند: لیژنەکانمان بە بەردەوامی و بە شێوەیەکی مەیدانی سەردانی نۆڕینگە، سەنتەر و دەرمانخانەکان دەکەن.

وتیشی: لەو چوارچێوەیەشدا دەستکراوە بە گرتنەبەری رێکاری یاسایی بەرامبەر سەرپێچیکاران و چەندین شوێنیش داخراون.

وتەبێژی تەندروستی گەرمیان ئاماژەی بەوەشکرد کە پرۆسەی چاودێرییەکە بەردەوامی دەبێت "دوای هەر گەڕان و پشکنینێک، لیژنەکان راپۆرتی وردی خۆیان رادەستی ئێمە دەکەن. ئێمەش لای خۆمانەوە راپۆرتەکان ئاراستەی وەزارەت دەکەین تاوەکو بەپێی جۆری سەرپێچییەکان، سزای پێویست بەسەر خاوەن شوێنەکاندا بسەپێنرێت".