رادیۆی دەنگ

بەتۆمەتی "زیادەڕۆیی" بۆ سەر دەسەڵاتەکانی بەڕێوبەرایەتی گواستنەوە، سەرۆکی لقی گەرمیانی سەندیکای کرێکاران راگیراوە.

سەرچاوەیەکی نزیک لە سەرۆکی لقی گەرمیانی سەندیکای کرێکاران، بۆ رادیۆی دەنگ وتی: عەدنان محەمەد، سەرۆکی لقی گەرمیانی سەندیکای کرێکاران، ئەمڕۆ لەسەر سکاڵای بەڕێوبەرایەتی گواستنەوەی گەرمیان و بە فەرمانی دادوەر، راگیراوە.

وتیشی: بەهۆکاری ئەوەی سەندیکای کرێکاران هەستاوە بە دیاریکردنی شوێنی تەکسییەکانی بازاڕی کەلار، بەڕێوبەرایەتی گواستنەوەی گەرمیان سکاڵای تۆمارکردوە و دەڵێن تەداخولی لە کاروبارەکانمان کردوە.

بەوتەی سەرچاوە نزیکەکە لە سەرۆکی لقی گەرمیانی سەندیکای کرێکاران، ئەو رێکارەی شوێنی تەکسییەکان ئەوان بە تەنیا نەیانکردوە، بەڵکو بە لیژنە کردویانە و کۆنوسی کۆبونەوەی هەیە و قایمقامیەتی کەلار و هاتوچۆش واژویان کردوە، ئەمەش بەمەبەستی ئەوەی قەرەباڵغی دروست نەبێت.

لەئێستادا سەرۆکی لقی گەرمیانی سەندیکای کرێکاران، لە بەڕێوبەرایەتی گرتن و گواستنەوەی گەرمیان راگیراوە.