رادیۆی دەنگ

ئێوارەی ئەمڕۆ روداوێکی تەقەکردن لە قەزای رزگاریی رویدا و ۲ کەس برینداربون، کە یەکێک لە بریندارەکان ئەحمەد حاجی فاتم بازرگانی دیاری گەرمیانە، بەڕێوبەرایەتی پۆلیسی گەرمیانیش وردەکاری روداوەکە دەخاتەڕو و دەڵێت: بەدوای تۆمەتبارەکەوەین. 

دوانیوەڕۆی ئەمڕۆ لە روداوێکی تەقەکردندا لە قەزای رزگاریی، ٢ کەس بریندار بون کە یەکێکیان ئەحمەد عەلی ناسراو بە "ئەحمەدی حاجی فاتم"، ئەندامی ژوری بازرگانی سلێمانییە.

سۆران حەمەغەریب، وتەبێژی پۆلیسی گەرمیان، بە رادیۆی دەنگی راگەیاند: لێکۆڵینەوە لە روداوەکە بەردەوامە، گومان دەکەین روداوەکە پەیوەندی بە کێشەی کۆمەڵایەتییەوە هەبێت.

وتیشی: تۆمەتبارەکە ناسراوەتەوە و فەرمانی دەستگیرکردنی بۆ دەرچوە و هێزەکانمان رێکارەکانیان دەستپێکردوە. 

لەبارەی دۆخی بریندارەکانیشەوە، وتەبێژی پۆلیسی گەرمیان دەڵێت: دۆخی یەکێکیان جێگیرە، بەڵام یەکێکیان دۆخی تەندروستی وا دەخوازێت رەوانەی سلێمانی بکرێت.