رادیۆی دەنگ

تائێستا ئەو ٢٠٠ هێڵە نوێیەی بڕیاربو  بەسەر شۆفێرەكانی كەلاردا دابەشبكرێت بۆ گەڕەک و سیتییە نوێیەکان، دابەشنەكراوە؛ لایەنە پەیوەندیدارەکانیش هۆکاری جیاواز باس دەکەن.

پێش ماوەیەک بەڕێوبەری گواستنەوەی گەرمیان ئاماژەی بەوەکرد رێکارەکانی دابەشکردنی ٢٠٠ هێڵی نوێی ناوخۆیی کەلار قۆناغی پێویستی بڕیوە و ئۆتۆمبیلەکان رەوانەی بەڕێوبەرایەتی هاتوچۆ کراون بۆ ئەنجامدانی پشکنینی توندوتۆڵی و بەڕاد بۆیان.

بەڵام لە لێدوانێکی نوێدا بۆ رادیۆی دەنگ، وتەبێژی بەڕێوبەرایەتی هاتوچۆی گەرمیان، رەتیدەکاتەوە كە هیچ ئۆتۆمبێلێك هاتبێتە لایان.

سامان عەلی، وتیشی: هیچ ئۆتۆمبیلێک بۆ ئەو مەبەستە نەهاتوەتە لامان و بەپێی ئاگاداربونمان ناوی ئۆتۆمبێلەكان لە سەندیكایە و دواتر دێتە لای ئێمە.

لایخۆشییەوە سەرۆکی لقی سەندیکای کرێکاران باس لەوەدەکات ناوەکان لەلای ئەوان نەماون.

عەدنان شێخ محەمەد، بە رادیۆی دەنگی وت: زۆر دەمێكە ناوەكانمان ناردوە بۆ بەڕێوبەرایەتی گواستنەوە و بە نوسراوێکی فەرمییش داوامان لە قایمقامیەتی کەلار كردوە كە لیژنەیەك پێكبهێنن بە مەبەستی تەواوكردنی كارەكانی ئەم ٢٠٠ هێڵە، بەڵام هێشتا وەڵامیان نەداوینەتەوە.

جەختیشیکردەوە: پێویستە لیژنەیەك پێکبهێنرێت و كارەكانی تەواوبكرێت، چونكە هۆكاری دواكەوتنی پرۆسەکە پێكنەهێنانی لیژنەیەكە تائێستا.

ئەو ٢٠٠ هێڵەی کە بڕیارە دابەشبکرێت، بۆ ئەو گەڕەک و سیتییە تازانەیە کە لەم ساڵانەی دواییدا دروستکراون و خەڵکی تێیاندا نیشتەجێ بون.