رادیۆی دەنگ

هێشتا لە بەشێكی زۆری قوتابخانە حكومییەكانی گەرمیان خوێندنی ئۆنلاین دەستیپێنەكردوە و قوتابیان مەترسییان لە فەوتانی وەرزی دوەمی خوێندنیان هەیە، پەروەردەی سنورەكەش جەخت لە بونی گرفت لە بەرنامەكەدا دەكاتەوە.

ئەرسەلان پەرۆش، بەڕێوبەری راگەیاندنی بەڕێوبەرایەتی پەروەردەی گەرمیان، بە رادیۆی دەنگی وت: پڕۆسەی خوێندنی ئۆنلاین لە بەشێكی زۆری قوتابخانە حكومییەكان دەستیپێنەكردوە، ئەمەش بەهۆی بونی گرفت لە بەرنامەكەدا كە ئەگەری هەیە هۆكارەكەی ئەو لۆدە زۆرەبێت كە لەسەریەتی.

وتیشی: لەهەندێك لە قوتابخانەكاندا بەشێوەی تایبەت و دانانی گروپ مامۆستایان ڤیدیۆی وانەكان ئامادە دەكەن و دەینێرن بۆ قوتابیان و خوێندكاران، بەڵام ئەمە تەنها لە بەشێكی كەمی قوتابخانەكاندا هەیە.

باسی لەوەشكرد: هێشتا رێگەچارەی دیكە نیە بۆ چارەسەری ئەم کێشەیە، چاوەڕێی وەزارەتین بزانین چ بڕیارێك دەدات لە بارەی خوێندنەوە.