رادیۆی دەنگ

دوای ئەوەی بەشێکی بەرچاو لە کۆڕنیشەکەی کەلار داڕوخا و زیانی پێگەیشت، بەڕێوەبەری گشتی وەبەرهێنانی گەرمیان دەڵێت: بەرپرسیارێتیی کۆمپانیای جێبەجێکارە.

هونەر مەحمود، بەڕێوبەری گشتی وەبەرهێنانی گەرمیان بۆ رادیۆی دەنگ وتی: کۆمپانیا بەرپرسیارێتی داڕوخانی کۆرنیشەکە لە ئەستۆ دەگرێت، چونکە دیزانی پرۆژەکە خۆیان کردویانە، لە کۆتایشدا پێی چاکدەکرێتەوە و بەشێوازێکی تۆکمە و کۆنترۆڵکراو پێیان دروستدەکرێتەوە.

وتیشی: ئەوەی خۆشحاڵییە، کۆرنیشەکە لەکاتێکدا داڕوخاوە سەردانیکەری لێنەبوە و هیچ حاڵەتێکی دڵتەزێن روینەداوە، ئەگەر نا بۆ کۆرنیشەکە نیگەرانین و دوبارەش دیزانین دەکرێتەوە بە زوترین کات چاکدەکرێتەوە.

دەشڵێت: پێشتر نوسرامان کردوە و ئاگاداری کۆمپانیامان کردوەتەوە لەبارەی ئەوەی خۆیان بەرپرسیارن لەو دیزاینەی کە کۆڕنیشیان لەسەر دروستکردوە، جەختمان کردونەتەوە کە خۆیان بەرپرسیارن لە هەر حاڵەتێک لە روی کوالێتییەوە روبدات.

لەبارەی کەمکردنەوەی زیانەکان ئەگەر زۆنی ۲ و ۳ بەیەکەوە تەواو بکرایەن ئایا بەو شێوەیە دەبو؟

بەپێی وتەی بەڕێوبەری گشتی وەبەرهێنانی گەرمیان، کۆرنیشەکە بۆیە وایلێهاتوە، چونکە هێشتا لە کاتی جێبەجێکردندایە و لەکاردایە، ئەگەر تەواو بوایە وانەدەبو.

وتیشی: هاوکات جیاوازیی پێدانی مۆڵەت بە زۆنی ۲ و ۳ـی سەر روباری سیروان زۆرە، زۆنی ٢ کە پرۆژەی مارینایە پێشتر دەستیپێکردوە و زۆنی ٣ دواتر دەستیپێکردوە.