رادیۆی دەنگ

دوای ئه‌وه‌ى خاوه‌ن نه‌مامگه‌یه‌ك له‌ قه‌زاى رزگاریی رایگه‌یاند دواى 8 ساڵ لەکارکردن نەمامگەی بەهۆی سکاڵایەکەوە داخراوە، شاره‌وانى قه‌زاكه‌ش رونكردنه‌وه‌ ده‌دات.

ئه‌رسه‌لان ئه‌حمه‌د، سه‌ۆكى شاره‌وانى قه‌زاى رزگاریی بۆ رادیۆى ده‌نگ وتى: لیژنه‌یه‌كى ده‌سته‌ى نه‌زاهه‌ى سلێمانى سه‌ردانى كردین له‌سه‌ر سكاڵای هاوڵاتیه‌ك لەبارەی ئەوەی‌ نه‌مامگه‌ى رزگاریی نایاساییە‌ و ده‌بێت دایبخه‌ین.

وتیشى: له‌كاتێكدا ئه‌م نه‌مامگه‌یه‌ به‌ خۆبه‌خشانه‌ و بۆماوه‌ى 8 ساڵه‌ به‌بێ به‌رامبه‌ر خزمه‌ت به‌ رزگاریی ده‌كات و هه‌مو رێژه‌ سه‌وزاییه‌كانى قه‌زاكه‌ له‌ نێوچاوانى ئه‌وه‌وه‌یه‌.

ده‌شڵێت: ئه‌و نه‌مامگه‌یه‌ له‌سه‌ر شه‌قامه‌ و شوێنێكى داگیرنه‌كردوه‌ تاوه‌كو بڵێن زه‌وى داگیركردوه‌، ئه‌وه‌ى هه‌یه‌ ته‌نها به‌مه‌به‌ست كراوه‌ و ناشزانین هۆكاره‌كه‌ى چیه‌، بۆیه‌ چه‌ند رۆژێكه‌ ده‌ست به‌ لابردنى ئه‌و نه‌مامگه‌یه‌ كراوه‌.

هێماى بۆ ئه‌وه‌شكرد: تاوه‌كو دۆخه‌که‌ به‌مشێوه‌یه‌ بێت، ناتوانین شوێنێكى دیکەی بۆ دابین بكه‌ین.

پێرێ یاسین حەمەئەمین، خاوەنی نەمامگەی رزگاریی، بە رادیۆی دەنگ وت: دوای هەشت ساڵ نەمامگەکەم داخستوە، چونکە بەوتەی خۆیان دەستەی نەزاهە فەرمانی کردوە دابخرێت، لەکاتێکدا هیچ هەڵەیەک شک نابەین کە کردبێتمان و هیچ لایەنێکی پەیوەندیداریش هۆکاری داخستنەکەیمان پێ ناڵێت.