رادیۆی دەنگ

 

لە زۆرێک لە قەزا و ناحییەکا ی گەرمیان بنکە و ئامێری پێوانی باران نییە، بەڕێوبەرایەتی کشتوکاڵی گەرمیانیش هۆکارەکەی دەبەستێتەوە بە کێشە داراییەوە.

 

بەپێی بەدواداچونی رادیۆی دەنگ، تەنها لە چەند قەزا و ناحییەیەکی گەرمیان بنکەی تایبەت بە پێوانەی باران هەیە، ئەمەش وادەکات ناوچەکانی دیکە بێبەش بن لە هەر تۆمارێکی باران بارین کە دواتر بەمەبەستی توێژینەوە و زانیاریی دیکە سودی لێببینرێت.

 

ستار عەلی، وتەبێژی بەڕێوبەرایەتی گشتی کشتوکاڵی گەرمیان، بۆ رادیۆی دەنگ جەختی لەو حاڵەتە کردەوە و وتی: هەبوونی ئەم ئامێرانە گرنگییەکی زۆری هەیە بۆ ناوچەکەمان، چونکە ئامارێکی ورد و دروستمان دەربارەی بڕی بارانبارین پێدەبەخشێت، بەڵام بەهۆی قەیرانی داراییەوە نەتوانراوە لە تەواوی ناوچەکان ئامێر جێگیر بکرێن.

 

ئاماژەی بەوەشکرد، لە ئێستادا تەنها لە شەش ناوچەی سنورەکە (قەزاکانی کەلار، کفری و خانەقین و ناحییەکانی: باوەنور، مەیدان و شێخ تەویل) ئامێری تۆماركردنی بارانبارین هەیە.

 

وتیشی: هەوڵەکانیشمان بەردەوامە بۆ ئەوەی لە داهاتودا ناوچەکانی تریش بگرێتەوە.