قایمقامی كفری: هەنگاوی باش نراوە بۆ ده‌ستپێكردنه‌وه‌ى هەندێک لە پرۆژە خزمه‌تگوزارییه‌كان

2024/06/11    231 جار بینراوە
 
رادیۆی ده‌نگ
 
یەکەی چاودێری حکومەتی خۆجێی گەرمیان لەگەڵ قایمقامی قەزای کفری کۆبویەوە و  لە کۆبونەوەکەشدا گفتوگۆ کرا لە بارەی ئاستى خزمه‌تگوزارییه‌كان له‌ قه‌زاكه‌دا.
 
لە کۆبونەوەکەدا، ساهر عەلی، قایمقامی قەزای کفری باسی لەوەکرد: هەنگاوی باش نراوە بۆ ده‌ستپێكردنه‌وه‌ى کارکردن لە هەندێک لە پرۆژەکان لە قەزاکەدا چ لەسەر ئاستی وەزارەتەکان چ لەسەر ئاستی فەرمانگەکان.
 
وتیشی: لە ئێستادا کارمان لەسەر ئەوەکردوە ١٠ پارچە زەوی نایاب لە قەزاکە بفرۆشین و لە ئیدارەی گەرمیان تەندەرینی بۆ کراوە و کاری لەسەر دەکرێت، ئەو بڕە پارەیەی کە دێتەوە شارەوانی دەتوانین لە پرۆژە خزمەتگوزارییەکانی قەزاکەدا بەکاری بهێنین.
 
هێمای بۆ ئەوەشکرد: هاوکات لە ئێستادا کارکردن لە پرۆژه‌ى رێگاسازی و ئاوەڕۆی گەڕەکی راپەڕینی قەزاکە دەستیپێکردوە، گوژمەکەشی خۆی لە ١ ملیار و ٥٠٠ ملیۆن دیناردا دەبینێتەوە.
 
لەبارەی ئەوەی پرۆژی چی دیکە هەیە رۆشتبێتە بواری جێبەجێکردنەوە لە قەزای کفری، قایمقامی قەزاکە وتی: لە ئێستادا بەردی بناغەی پرۆژه‌ى رێگاسازی (دوانزەئیمام-قەرەبڵاغ) دانراوە لەلایەن وەزارەتی ئاوەدانکردنەوە کە گوژمەی پرۆژەکەی خۆی لە ٦ ملیار دینار دەبینێتەوە، ئەمە جگە لەوەی چەندین پرۆژەی دیکەمان هەیە بەهۆی قەیرانی داراییەوە کارکردن تیایاندا وەستاوە و بەردەوامین لە کارکردن تیایاندا بۆ ئەوەی دەست پێبکەنەوە.
 


Radiodeng.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 4,280,347     ژمارەی میوان 703