بودجه‌ى چاككردنه‌وه‌ بۆ رێگاوبانه‌كانى گه‌رمیان خه‌رجناكرێت

2021/07/10    851 جار بینراوە
 
رادیۆی دەنگ
 
به‌ وته‌ى به‌ڕێوبه‌رى رێگاوبانى گه‌رمیان له‌ گه‌رمیان نه‌ به‌رێوبه‌رایه‌تى چاككردنه‌وه‌ى رێگاوبانه‌كان هه‌یه‌ نه‌ بودجه‌ی ئه‌و به‌ڕێوبه‌رایه‌تیه‌ش بۆ سنوره‌كه‌ خه‌رجده‌كرێت كه‌ هۆكاره‌ بۆ چاككنه‌كردنه‌وه‌ى رێگاوبانه‌كان.
 
عه‌دنان خه‌لیل، به‌ڕێوبه‌رى رێگاوبانى گه‌رمیان له‌ كۆبونه‌وه‌ى له‌گه‌ڵ یه‌كه‌ى چاودێرى حكومه‌تى خۆجێی گه‌رمیان ئاماژه‌ى به‌وه‌كرد: كه‌ یه‌كێك له‌ هۆكاره‌ سه‌ركیه‌كانى خراپى رێگاوبانه‌كانى گه‌رمیان چاكنه‌كردنه‌وه‌ى رێگاوبانه‌كانه‌ كه‌ له‌ توانانى به‌ڕێوبه‌رایه‌تیه‌كه‌ى ئه‌واندا نیه‌.
 
وتیشى: به‌ڕێوبه‌رایه‌تى چاككردنه‌وه‌ى رێگاوبانه‌كان له‌ سلێمانى هه‌یه‌، به‌ڵام له‌ گه‌رمیان نیه‌ و جگه‌ له‌ نه‌بونى به‌ڕێوبه‌رایه‌تیه‌كه‌ بودجه‌ى چاككردنه‌وه‌ى رێگاوبانه‌كانیش خه‌رجناكرێت.
 
جه‌ختى له‌وه‌شكردوه‌: هه‌وڵه‌كانیان بۆ ته‌واوكردنى ئه‌و پرۆژانى راگیراون له‌ سنورى به‌ڕێوبه‌رایه‌تیه‌كه‌یان به‌رده‌وامه‌، به‌ڵام خه‌رجكردنى پاره‌ بۆ پڕۆژه‌كان له‌ ده‌سه‌ڵاتى ئه‌واندا نیه‌.
 
هاوكات دلێر حه‌سه‌ن، ئه‌ندازیار و به‌رپرسى پرۆژه‌كانى شاره‌وانى كه‌لار له‌باره‌ى گرفتى شه‌قامه‌كانه‌وه‌ باسى له‌وه‌كرد: گرفتیان له‌ كۆنترڵكردنى شه‌قامه‌كان هه‌یه‌ وه‌ك له‌ نه‌بونى شه‌قام، هه‌روه‌ك وتیشى: سه‌رقاڵى دیزاینكردنى چه‌ند رێگایه‌كن بۆ كه‌مكردنه‌وه‌ى قه‌ره‌باڵخى ناوشارى كه‌لار.
 
چالاكوانانیش له‌باره‌ى گرفته‌كانه‌وه‌ بۆچونه‌كانى خۆیان خسته‌ڕو باسیان له‌وه‌كرد كه‌ پێویسته‌ كۆى هه‌وڵه‌كان یه‌ك بخرێن بۆ ته‌واوكردنى رێگا سه‌ره‌كیه‌كانى نێوان شاره‌كان به‌ تایبه‌تى رێگاى كه‌لار-سلێمانى و كه‌لار- كفرى.
 
جه‌ختیان له‌وه‌شكرده‌وه‌: كه‌ هه‌ڵمه‌ته‌كانیان بۆ فشاركردن و چاككردنى شه‌قام و رێگاوبانه‌كان به‌رده‌وام ده‌بێت.
 
یه‌كه‌ى چاودێرى بۆ به‌دواداچونى راپۆرتى گرفتى شه‌قام و رێگاوبانه‌كانى گه‌رمیان له‌گه‌ڵ عه‌دنان خه‌لیل، به‌رێوبه‌رى رێگاوبانى گه‌رمیان و ئه‌ندازیار دلێر حه‌سه‌ن، به‌رپرسى به‌شى پرۆژه‌كانى شاره‌وانى كه‌لار و چالاكوانان سامان عه‌زیز، نه‌به‌رئه‌حمه‌د و زمناكۆ یه‌حیاى كۆبوه‌وه‌ راپۆرتى یه‌كه‌كه‌ و گرفتى شه‌قام و رێگاوبانه‌كان تاوتوێكران.
 
 
 


Radiodeng.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 4,150,684     ژمارەی میوان 309